Pitu caleya a la güela'l farton por el farton

Lo primero, gracies a Antonio por dexame pasar una receta de tola vida, espero que vos preste a toos. Lo segundo ye contarosla, claro. Güei tuvimos un dia prestosu, como tamos preparando un eventu cola familia acercamosnos a Villabona pa que la mio güela nos aprendiere a preparar pitu y fabada, bono aprendenos y preparalos, claro. Cuando ties la costume de prebar una fabada y un pitu como esos de mio güela, esperes una receta con dellos trucos, que menos, pero al final lo que te sorprende ye lo cenciello que cocinen los nuesos mayores y la falta de trucos maxicos! :-)

Al casu, entamo cola receta'l pitu a la Amparin. Lo primero carniceria de confianza y mercar los pitos. Dende que falta mio güelu y los sos pitos, esta gueta conviertese en fundamental. N'esti casu, carniceria piquiñina a la vera de La Palomba, n'Uvieu. El paisanu cria pitos de los de tola vida, bien llindaos y prietos que se ve na mas echa-y un güeyu a la carne. 4 pitos, 11 Kg, 45€por pitu. Dependiendo de lo cocinines que seyais, podeis trocealos en casa o pedi-yos que lo faigan ellos (que fue la nuesa opcion).
Coles manes na masa, ponemos a frir los cachos en diferentes sartenes y con abundante aceite d'oliva. Enantes d'ello echamos-yos sal al gustu (como son pitos de "caza" nun pasa na por char pasavos un poco de la cantida de sal normal que cheis pa pitos blancos) y cuando ten bien fritinos los metemos, xunto col aceite sobrante de la sarten, n'una pota (semeya un) onde espera una cama de cebolles (una grande por pitu y dependiendo del tamañu del pitu, claro, estos yeren de casi 3 Kg ca un).
Ah!, los figados frimoslos solos con casi na d'aceite y dempues a la pota col restu. Echamos dalgo mas d'un cuartu de vino blancu (si ye del bono, meyor) y'l resultau (semeya 2) a fueu llentu durante 4-6 hores dependiendo'l pitu. N'esi tiempu vamos mirando si tienen salsina y si lo vemos escasu metemos agua y de vegada'n vegada damos-yos vuelta a los cachos y...ya ta!! Diox!!! el trucu deben ser los años de preparalo nel mesmu fueu y la mesma pota y sobre too, el pitu. En fin, probai, pero queda como la semeya 3(impresionante). Como ye pa un eventu, el pitu fue pal conxelador hasta'l domingu que vien, por eso nun teo semeya presentandolu. Pa completar el platu, patquines frites en cuadraos con ello. Nosotros preparemos les pataques el dia anterior pola nuechi y les caldiaremos meties na pota colos pitos, pero esi ye otru cantar. Otru dia cuentovos la de les fabes, porque si esta nun tien trucu, lo de les fabes foi la hostia ya, rises que pasamos toos que esperabemos otru toque maxicu y na...que nun hubo.